مراجعة مسلم بالبطاقة

مبدأيًا الغلاف جميل وبيوصل هدف الكتاب عكس كتب تانية بتبقى حاطة غلاف ملوش علاقة، والإسم كذلك جذَّاب. الأسلوب للأسف ضعيف، بحس إن الواحد لما يقرأ كتب كبيرة (حتى لو مش فاهم اللي بيقرأه كله) وبعدها يقرأ كتب لناس جداد في عالم الكتابة، بيحس بالفرق ده أكثر من اي حد تاني ممكن يفضل منبهر بالكتاب ويتكلم عنه ويقترحه لكل حد يعرفه إنه أحسن كتاب في العالم.

الكتاب مجموعة قصص قصيرة، موجَّه لفئة مُعيّنة- وهي الناس اللي مش بتمارس أبسط أوامر الإسلام زي الصلاة والصوم وتجنب الخمر والزنا- كحافز ليهم إن في ناس في مكانٍ ما على الأرض كانوا شبههم وإتغيّروا 180 درجة بناءً على مواقف معينة قابلتهم في حياتهم.

معجبتنيش سطحية الكتاب، زي الكلام عن اللحية والنقاب ودروس المسجد وكأنها هي علامة تدل على إسلام الشخص، وبدونهم هو ناقص وإيامنه غير كامل. كان ممكن يركز أكتر على جانب الاخلاق والتقوى وحُب الله، لإن دول اللي بيجي منهم كل شئ بعد كده. والحقيقة تقال كان له كلام على الشكر وحُسن الخلق لكنه قليل جدًا.

في المُجمل، الكتاب ممكن يكون سبب لهداية ناس للطريق الصح ومساعدتهم على أخد خطوة لقدام، حتى ولو الخطوة دي هي مجرد “العلم بالخطأ” .. والتفكيرمع نفسهم “هل أنا ماشي صح في حياتي؟

* نورهان علي